Exposición CantáMOLA en galego

Cantarmos na nosa lingua é un xeito de vivila, de gozarmos dela, de celebrala.

- Pepe Cunha, comisario da exposición.

Desde hoxe ata o día 30 de xaneiro estará exposta nos corredores da EOI a mostra CantáMOLA en galego, unha exposición que celebra a diversidade da música en galego no século XXI.

O Servizo de Normalización Lingüística do Concello de Pontevedra puxo en marcha esta exposición coa axuda do crítico musical Pepe Cunha e da xornalista Teresa Cuíñas. Inaugurouse no mes de maio nas rúas de Pontevedra, para despois converterse nunha exposición itinerante para os centros de ensino.

Nos corredores da EOI podemos ver os 14 paneis que compoñen a mostra xeral, así como os 8 que se refiren especificamente ao panorama musical na provincia de Pontevedra. 

Pero, ademais do material visual, a exposición inclúe listaxes de reprodución en Spotify e Youtube e unha unidade didáctica. Podes acceder a todo desde aquí:

Listaxe de reprodución en Spotify

Canle de Youtube

Catálogo e unidade didáctica

Velaquí unha listaxe do contido de cada panel. Que gocedes da exposición... e da música!

Panel 1. INTRODUCIÓN. Co século XXI e a chegada de Internet e as facilidades de gravación e difusión, a música cantada en galega abriuse a estilos musicais que antes non empregaba.

Panel 2. SER UNHA MESMA – CANCIÓN DE AUTORÍA. Propostas onde o selo de seu, onde a figura da vocalista-compositora é máis protagonista.

Paneis 3 e 4. POP-ROCK. Dentro do pop-rock as bandas son moitas; unhas máis orixinais ou alternativas e outras máis clásicas, pero todas enchidas da electricidade das guitarras, o baixo e a batería marcando o ritmo …

Panel 5. MÚSICAS URBANAS, ELECTRÓNICA, EXPERIMENTACIÓN. Sons argallados coas posibilidades das computadoras, sintetizadores e outros trebellos.

Panel 6. RAP / HIP HOP. Se pensamos na palabra, en mensaxes e discursos con rima, en retórica, coincidiremos en que o rap é o recurso estilístico por excelencia. En galego tamén.

Paneis 7 e 8. Máis TRADI… ou menos TRADI. Con artistas ás veces máis fieis á tradición e outras a darlle unha volta, o noso país é referente en música tradicional, de seu, propia.

Panel 9. SE ISTO NON SE AMAÑA, CAÑA, CAÑA, CAÑA. Letras con compromiso político e crítica social unida ao punk, rock duro, metal, heavy…

Panel 10. MESTIZAXE / RITMOS DO MUNDO. Os máis habituais pop e rock fúndense con ritmos xurdidos noutras parte do mundo: ska, funk, disco, cumbia, reggae, kletzmer…

Panel 11. INFANTIL E FAMILIAR. Un feixe de proxectos para cantarmos letras divertidas e sensíbeis en familia sen descoidar a calidade e diversidade musical.

Panel 12. XUNTAS e REVOLTAS. E HUMOR. Os discos recompilatorios e tributos son outra fonte de cancións en galego e o humor tamén está presente en varias propostas.

Panel 13. SINGULARES / ÁS VECES. Non podemos esquecer traballos punctuais ou particulares e as artistas que de cando en vez gravan na nosa lingua.

Panel 14. CONCLUSIÓN E RECURSOS. Animámoste a consumir máis música en galego e propoñemos lugares de encontro para atopala.

Paneis Pontevedra. Directorio de recursos da administración local (de formación e de práctica) a disposición da cidadanía e sumario dos eventos culturais (de iniciativa pública e privada) máis importantes que se celebran no municipio e que teñen na música popular contemporánea un dos seus eixos.