Noticia gañadora do Concurso Literario das Letras Galegas 2026

 

Xa temos noticia gañadora do Concurso Literario organizado polo EDLG con motivo do Día das Letras Galegas. Parabéns á xornalista gañadora e moitas grazas a todas as persoas que participaron. Begoña Caamaño estaría orgullosa do seu traballo!

Nacen "Os Bros da Fala": a nova vangarda que sitúa a Galicia como potencia mundial

SANTIAGO – O Pazo de San Roque de Santiago de Compostela acolleu este 17 de maio a presentación oficial dos Bros da Fala, o colectivo de "galingüistas" e líderes da Galosfera que está a transformar a realidade do país. O acto centrouse nunha emotiva homenaxe á figura de Begoña Caamaño, cuxo legado definiron como o motor principal do cambio xeracional.

Durante o seu discurso, o grupo destacou que obras como Circe ou o pracer do azul foron fundamentais para construír un novo modelo de relacións entre a mocidade. Así mesmo, sinalaron que a defensa de figuras como Morgana, como símbolo da muller que reclama o seu espazo e voz, deu os seus froitos: Galicia consolídase hoxe como a primeira potencia mundial en cultura, economía sostible e innovación, xa que son miles de mulleres galegas as que ocupan, por fin, os postos de alta responsabilidade no país.

Grazas á inxente produción audiovisual e literaria desta nova fornada de creadores e creadoras que son Os Bros da Fala, o galego sitúase hoxe como a lingua maioritaria, liderando un proxecto de futuro que une identidade e vangarda.