O EDLG colabora co Club de Lectura da EOI

 Xa coñeces o Club de Lectura da EOI? Como cada curso, o EDLG participa co Club na lectura dunha obra en galego. Este ano será a novela O último barco de Domingo Villar, publicada pola Editorial Galaxia. A actividade rematará cun encontro virtual co autor no mes de xaneiro. Aínda estás a tempo de participar! Envía un correo electrónico indicando o teu nome completo e a lingua que estudas na EOI a isalanova@edu.xunta.es.

 

A filla do doutor Andrade vive nunha casa pintada de azul, nun lugar onde as praias de ondas mansas contrastan co bulir da outra beira. Alí, as mariscadoras pescudan na area, os mariñeiros botan os aparellos á auga e os que van traballar á cidade agardan no peirao a chegada do barco que cruza cada media hora a ría de Vigo. Unha mañá de outono, mentres a costa galega se recupera dos estragos dun temporal, o inspector Caldas recibe a visita dun home alarmado pola ausencia da súa filla, que non se presentou a un xantar coa familia na fin de semana nin acudiu o luns a impartir a súa clase de cerámica na Escola de Artes e Oficios. E, aínda que nada pareza alterado na casa nin na vida de Mónica Andrade, Leo Caldas axiña ha comprobar que na vida, coma no mar, a máis apracible das superficies pode agochar un fondo escuro de correntes devastadoras.

Coa súa primeira novela, Ollos de auga (2006), Domingo Villar iniciou a serie protagonizada polo inspector Leo Caldas. A segunda, A praia dos afogados (2009), supuxo a súa consagración no panorama internacional da novela negra con traducións en todo o mundo. Coas súas obras obtivo o Premio Frei Martín Sarmiento, o Premio Losada Diéguez e o do Libro do Ano da Federación de Libreiros de Galicia, ademais dos premios Sintagma e Brigada 21. Foi finalista dos Crime Thriller Awards e Dagger International en Reino Unido, do Premio Le Point du Polar Européen en Francia e do Premio da Academia Sueca de Novela Negra.

Máis información: http://editorialgalaxia.gal/autor/domingo-villar/