Poema gañador do concurso "Muller sentida. A muller nos sentidos"

Poema gañador do concurso de redacción MULLER SENTIDA, A MULLER NOS SENTIDOS

Repelía o medo a súa presenza

Imaxe escura, pano negro

Fíos, teas contra a miseria

Costureira

Herdei palabras milenarias

Sorna, refráns, cantigas, lingua eterna

Barricadas de cor contra o esquecemento

Pan, suor e bágoas na artesa

Mamá Hermelinda, muller eterna,

Mentres busco palabras para lembrarte, esquezo a dor da túa ausencia

Tes que lle escribir a madriña. Na Arxentina recibiron a carta. Xa es unha moza

Palabras para habitar, para facermos a casa cos rostros que nunca foron

Doce de leite, arepa, filloa

Fálame do vestido que che fixo a avoa, nai

Dos anos da fame e a ausencia de escola

A lixivia na madeira anunciaba o sábado

Pan e leite para o almorzo

Torradas con azucre na merenda

Ule, alá vai a Carmiña cos pexegos

Arrecende a outono

Casa, nai, avoa

Mulleres, preludio de min mesma

Estarrecedora imaxe a do tempo sucando regos na desmemoria

MONTSE NOVOA GÓMEZ